Հուլիսի 29-ին տեղի ունեցավ ոստիկանության կրթահամալիրի ակադեմիայի իրավագիտության ֆակուլտետի բակալավրիատի առկա անվճար ուսուցման 2015-2016 ուսումնական տարվա շրջանավարտների դիպլոմների և կրծքանշանների հանձնման հանդիսավոր արարողությունը, որին մասնակցում էին  կրթահամալիրի ղեկավար կազմը, դասախոսները, ներկա էին նաև շրջանավարտների ծնողները:

Ակադեմիայի իրավագիտության ֆակուլտետի շրջանավարտները դիպլոմները ստացան` որպես ոստիկանի պատասխանատու գործը ստանձնելու պատրաստականության հավաստագիր: Քառասունմեկ շրջանավարտներից հինգը արժանացան գերազանցության դիպլոմի:

Նորընծա սպաների հանդիսավոր քայլերթից հետո ՀՀ ոստիկանության կրթահամալիրի պետ, ոստիկանության  գեներալ-լեյտենանտ  Հովհաննես Վարյանը նրանց բարի երթ մաղթեց ոստիկանի դժվարին, բայց պատվավոր առաքելության իրականացման ճանապարհին: Շնորհակալական խոսքով  հանդես եկան  շրջանավարտներն ու ծնողները:

Հանդիսավոր արարողության ավարտից  հետո շրջանավարտները ծաղիկներ խոնարհեցին ծառայության ընթացքում զոհված ոստիկանության  ծառայողների  հուշակոթողին: