Մարտի 17-ին  ՀՀ ոստիկանության կրթահամալիր էին այցելել ԱՄՆ Հետաքննությունների դաշնային բյուրոյի իրավական կցորդ  Հիդեր Բերգին և ՀՀ-ում ԱՄՆ դեսպանության Թմրամիջոցների դեմ պայքարի և իրավապահ համագործակցության ծրագրի փորձագետ Մարիցա Հովհաննիսյանը։

Հյուրերին դիմավորեցին  ՀՀ ոստիկանության կրթահամալիրի պետ, ոստիկանության գնդապետ Մ․Մուրադյանը և Կրթահամալիրի ղեկավար կազմը:

Հյուրերը Կրթահամալիրում էին  «Կանայք ոստիկանության համակարգում» թեմայի շրջանակներում  սովորողների հետ հանդիպելու նպատակով, որի ընթացքում բազմաթիվ հարցերի հետ մեկտեղ քննարկվեցին նաև ուսումնական գործընթացի կազմակերպման և փորձի փոխանակման հարցերը։

Հիդեր Բերգին նախ խոսեց իր փորձից, պատմեց, թե ինչ դժվարությունների է բախվել առօրյա աշխատանքի ժամանակ, նաև կիսվեց առաջացած դժվարությունների հաղթահարման  նրբություններով և առանձնահատկություններով։

Հ․Բերգին, որը բազմամյա փորձառություն ունի, ներկայացնելով կանանց դերն ու նշանակությունն ուժային կառույցներում, նշեց, որ կանայք ներգրավված են տարբեր ծառայություններում․ կան կին ծառայողներ, որոնք զբաղեցնում են ղեկավար պաշտոններ և բնավ չեն զիջում տղամարդ ծառայողներին։

Հանդիպման ընթացքում տեղի ունեցավ քննարկում, որի ժամանակ Կրթահամալիրի սովորողները բազմաթիվ հարցեր ուղղեցին բանախոսին։

Կրթահամալիրի պետն էլ իր հերթին բարձր գնահատեց ՀՀ ոստիկանության  և ԱՄՆ Հետաքննությունների Դաշնային Բյուրոյի համագործակցությունը և հույս հայտնեց, որ գործընկերային հարաբերությունները կշարունակեն զարգանալ ու ամրապնդվել: