ԵՄ կողմից ֆինանսավորվող EU-RESPOND դրամաշնորհային ծրագրի շրջանակում հուլիսի 29-ին և 30-ին ՀՀ ՆԳՆ կրթահամալիրում անցկացվեց Հյուրընկալող երկրի (Host Nation Support, HNS) կապի սպաների վերապատրաստումը։

  Վերապատրաստման նպատակն էր զարգացնել միջազգային օգնության ընդունման և համակարգման ոլորտում ներգրավված մասնագետների կարողությունները, ինչպես նաև նախապատրաստել մասնակիցներին 2026 թվականի հոկտեմբերին նախատեսվող Host Nation Support Table-Top Exercise (HNS TTX) հրամանատարաշտաբային վարժանքին։

   Վերապատրաստմանը մասնակցում էին շահագրգիռ պետական գերատեսչությունների, միջազգային և հասարակական կազմակերպությունների ներկայացուցիչներ, որոնք ներգրավված են արտակարգ իրավիճակների կառավարման, քաղաքացիական պաշտպանության և միջազգային համագործակցության գործընթացներում։

   Դասընթացի ընթացքում մասնակիցները ծանոթացան Եվրոպական միության Քաղաքացիական պաշտպանության մեխանիզմի (Union Civil Protection Mechanism – UCPM) գործունեությանը, Հյուրընկալող երկրի աջակցության (HNS) համակարգի նպատակներին և սկզբունքներին, կապի սպաների դերակատարությանը, ինչպես նաև միջազգային օգնության ընդունման և համակարգման ընթացակարգերին։ Վերապատրաստման ծրագրում ներառված էին նաև գործնական քննարկումներ և իրավիճակային վարժություններ, որոնք հնարավորություն տվեցին մասնակիցներին կիրառել ձեռք բերված գիտելիքները տարբեր սցենարների պայմաններում։

  Վերապատրաստումն ուղղված էր մասնակիցների մասնագիտական կարողությունների ամրապնդմանը, միջգերատեսչական համագործակցության արդյունավետության բարձրացմանը և միջազգային աջակցության համակարգման գործընթացներում գործնական հմտությունների զարգացմանը՝ նպաստելով Հայաստանի պատրաստվածության բարձրացմանը արտակարգ իրավիճակների արձագանքման ոլորտում։

   Միջոցառման ավարտին մասնակիցներին հանձնվեցին մասնակցության հավաստագրեր։