Ապրիլի 1-ին տեղի ունեցավ ՀՀ ՆԳՆ կրթահամալիրի գիտական խորհրդի 2025 թվականի նոր կազմով 2-րդ նիստը:

   Օրակարգային առաջին հարցի քննարկման արդյունքում գիտական խորհուրդն ընտրեց ՀՀ ՆԳՆ կրթահամալիրի կառավարման խորհրդի վեց անդամ, որոնք սահմանված կարգով կներկայացվեն ՀՀ ՆԳ նախարարի հաստատմանը:

   Երկրորդ հարցի քննարկման արդյունքում հաստատվեց «Հայաստանի Հանրապետության ներքին գործերի նախարարության կրթահամալիրի պրոֆեսորադասախոսական անձնակազմի աշխատանքների նորմավորման և կազմակերպման կարգը», որով սահմանվում են պրոֆեսորադասախոսական անձնակազմի աշխատանքների նորմավորման համար անհրաժեշտ սահմանաչափերը և ուսումնամեթոդական, գիտահետազոտական աշխատանքների տեսակները, դրանց համար հատկացվող ժամաքանակները:

   Երրորդ հարցի քննարկման արդյունքում հաստատվեց «Հայաստանի Հանրապետության ներքին գործերի նախարարության կրթահամալիրի ոստիկանական ուսումնական ստորաբաժանման սովորողների պրակտիկայի կազմակերպման և անցկացման կարգ»-ը, որով սահմանվեցին պրակտիկայի անցկացման ձևերը, գնահատման ուղենիշային չափանիշները, պրակտիկայի ընթացքում սովորողների կողմից լրացվող օրագրի ձևը:

   Չորրորդ հարցի քննարկման արդյունքում հաստատվեց Հայաստանի Հանրապետության ներքին գործերի նախարարության կրթահամալիրի հիմնական կրթական ծրագրերով սովորողների կարգավիճակի և ուսումնառության գործընթացի կազմակերպման ու ղեկավարման գործառույթների բաշխման  ընթացակարգը: Նշված որոշման արդյունքում նախորդ տարիններին կրթահամալիր ընդունված սովորողների համար իրավական հիմքեր ստեղծվեցին ուսումնառության բնականոն ընթացքն ապահովելու և համապատասխան մասնագիտությամբ ավարտական փաստաթուղթ տրամադրելու համար:

   Հինգերորդ հարցի քննարկման արդյունքում հաստատվեց լրացուցիչ կրթական ծրագրով ուսուցման կարգը: Սահմանվեց լրացուցիչ կրթական ծրագրերով սովորողների համար գնահատման կարգը, կրթահամալիրի կողմից տրվող ավարտական փաստաթղթի նմուշը, ուսումնական գործընթացի իրականացման ընթացքը: Հարկ է նշել, որ սույն փաստաթղթի ընդունումով ընդլայնվում է նաև լրացուցից կրթական ծրագրերի իրականացման հնարավորությունը ՀՀ ՆԳՆ կրթահամալիրում, քանի որ նախորդ կարգավորումները վերաբերում էին միայն վերապատրաստման ձևաչափով իրականացվող լրացուցիչ կրթական ծրագրերին:

   Գիտական խորհրդի օրակարգային վերջին՝ վեցերորդ հարցի քննարկման արդյունքում հաստատվեց «ՀՀ ներքին գործերի նախարարության ոստիկանության քրեական ոստիկանությունում պաշտոնների նշանակվելու նպատակով ոստիկանության ծառայողների վերապատրաստման դասընթացի համալիր քննության կարգ»-ը, որով սահմանվեցին քրեական ոստիկանությունում պաշտոնների նշանակվելու նպատակով ոստիկանության ծառայողների վերապատրաստման դասընթացի համալիր քննության անցկացման չափանիշները: