Վերադառնալ
03.04.2025

ՆԳՆ կրթահամալիրի ուսանողները մասնակցել են «Միջազգային իրավական կրթության զարգացումը դատախաղ-մրցույթների միջոցով» ծրագրին

ՆԳՆ կրթահամալիրի ուսանողները մասնակցել են «Միջազգային իրավական կրթության զարգացումը դատախաղ-մրցույթների միջոցով»  ծրագրին

   ՀՀ ՆԳՆ կրթահամալիրի իրավագիտության ֆակուլտետի վճարովի ուսուցման 3-րդ կուրսի սովորողներ Մալենա Մարությանը, Դիանա Բրուտյանը և դասախոս Ամալյա Սաֆարյանը մասնակցել են Հայաստանի միջազգային իրավունքի միության (ՀՄԻՄ) և Ռաուլ Վալենբերգի անվան մարդու իրավունքների և մարդասիրական իրավունքի ինստիտուտի հայաստանյան գրասենյակի հետ համատեղ կազմակերպված «Միջազգային իրավական կրթության զարգացումը դատախաղ-մրցույթների միջոցով» 2025թ․ ծրագրին։ «Դատախաղերի հմտություններ» խորագրով միջոցառումն անցկացվել է ս.թ. մարտի 28-30-ը Ծաղկաձոր քաղաքում։ Ծրագրի նպատակն է մասնակիցներին զինել դատախաղ-մրցույթներին պատրաստվելու համար անհրաժեշտ գիտելիքներով ու հմտություններով, համալրել միջազգային իրավունքով հետաքրքրվող ուսանողների գիտելիքները։ Դասընթացին զուգահեռ բուհերի ներկայացուցիչների համար անցկացվել է աշխատաժողով, որը դատախաղերի մասնակցության խնդիրների և հնարավորությունների շուրջ բացառիկ երկխոսություն հաստատելու հնարավորություն է ընձեռելու։
   Դասընթացին բանախոսությամբ հանդես են եկել ինչպես Հայաստանից, այնպես էլ արտերկրից հրավիրված՝ դատախաղերի կազմակերպման ու մասնակցության ոլորտում մեծ փորձառություն ունեցող մասնագետներ։
   Վերջում անցկացվել է դատախաղ, որից հետո մասնակիցներին տրամադրվել են հավաստագրեր:

   Դատախաղի թեման մարդկության դեմ ուղղված հանցագործություններն են եղել, հատկապես՝ խոշտանգումը: Դրա շրջանակներում մասնակիցներն առնչվել են ինչպես ներպետական օրենսգրքերի, այնպես էլ միջազգային մի շարք կոնվենցիաների: Առանձնացվել են մեղադրանքի և պաշտպանական կողմերը (6 թիմ), ըստ որում՝ տարբեր հալասարանների ուսանողների միջև կապն ապահովելու նպատակով նույն համալսարանի ուսանողները չեն ընգրկվել միևնույն թիմի կազմում: Դատախաղն անցել է 2 փուլով՝ գրավոր և բանավոր, և եթե գրավոր փուլում որևէ թիմ ներկայացրել է մեղադրական կողմը, ապա բանավոր փուլի ժամանակ վերջինիս արդեն վերապահվել է պաշտպանական կողմի դերախաղը: Դատախաղի արդյունքում հաղթողներ կամ պարտվողներ չեն ընտրվել, այն առավելապես ընկերական և ուսուցողական բնույթ է կրել։

   Լուսանկարները՝ Հայաստանի միջազգային իրավունքի միության ֆեյսբուքյան էջից։