Ուսումնական պրակտիկայի հրահանգավորում՝ պարեկային ծառայության սովորողների համար
![Ուսումնական պրակտիկայի հրահանգավորում՝ պարեկային ծառայության սովորողների համար Ուսումնական պրակտիկայի հրահանգավորում՝ պարեկային ծառայության սովորողների համար](/resources/policeacademy/img/news/big/1646132732,0678.jpeg)
Այսօր ՀՀ ոստիկանության կրթահամալիրում տեղի ունեցավ ուսումնական կենտրոնի նախնական մասնագիտական կրթության «Ոստիկանական գործ» մասնագիտության «Պարեկ» որակավորման երկրորդ հոսքի սովորողների մասնագիտական պրակտիկայի հրահանգավորումը, որն անցկացվելու է մարտի 7-ից 26-ը ՀՀ ոստիկանության Երևան քաղաքի պարեկային ծառայության ստորաբաժանումներում:
Հրահանգավորմանը ներկա էր ՀՀ ոստիկանության կրթահամալիրի ղեկավար կազմը՝ Կրթահամալիրի պետ, ոստիկանության գնդապետ Մանուկ Մուրադյանի գլխավորությամբ:
Կրթահամալիրի պետը, ողջունելով պարեկային ծառայության սովորողներին, նշեց, որ տեսական գիտելիքներն այժմ կարիք ունեն գործնականում տեղայնացվելու ու կիրառվելու, իսկ պրակտիկան անընդհատ սովորելու, կատարելագործվելու հնարավորություն է տալիս:
-Աշխատանքի բարձր որակին զուգահեռ՝ առաջնորդվե՛ք նաև մարդկային ու բարոյական բարձր արժեքներով,-նշեց կրթահամալիրի պետը՝ հաջողություն մաղթելով պարեկային ծառայության սովորողներին և հորդորելով պրակտիկան անցնել ըստ էության, լուծել իրենց առջև դրված խնդիրները, հենվել իրավունքի գերակայության սկզբունքի վրա:
ՀՀ ոստիկանության կրթահամալիրի պետի առաջին տեղակալ, ոստիկանության փոխգնդապետ Միսակ Մարկոսյանը սովորողներին ծանոթացրեց ուսումնական պրակտիկայի առանձնահատկություններին, կարգուկանոնին և ընդգծեց, որ ուսումնական պրակտիկայի բարեհաջող ավարտից հետո է, որ սովորողները հնարավորություն կունենան մասնակցելու պետական ատեստավորման քննություններին:
ՀՀ ոստիկանության կրթահամալիրի ուսումնական կենտրոնի պետ, ոստիկանության գնդապետ Արմեն Սուքիասյանը խոսեց ուսումնական պրակտիկայի ծրագրի, իրավական հիմքերի, ժամկետի հարցերի շուրջ:
Հանդիպման վերջում սովորողները հնչեցրին հարցեր ու ներկայացրին իրենց առաջարկներն ուսումնական գործընթացի վերաբերյալ: