«Կրթահամալիրի սովորողները» խորագրով նախագծի շրջանակներում այս անգամ զրուցել ենք  ՀՀ ՆԳՆ ոստիկանության կրթահամալիրի 3-րդ  կուրսի սովորող, ոստիկանության սերժանտ Ժաննա Վարդանի Տեփանոսյանի հետ։

-    Ինչպիսի՞ ն էր փոքրիկ Ժաննան: Երեք նախադասությամբ պատմի՛ր քո մասին։

-   Այս փոքրիկ աղջնակը շատ շարժուն էր, ակտիվ, անընդհատ ուզում էր խառնվել մեծերի խոսակցությանը, բայց հետո հիշում էր, որ մայրիկն արգելել է:

Հաճախում էր տարբեր խմբակների՝ երգի, պարի, սպորտի։ Մանկուց ընտանիքում բոլորի ուշադրությունը միշտ կենտրոնացված Է եղել  ինձ վրա, քանի որ ես ընտանիքի միակ զավակն եմ, երևի հենց դրա համար էլ երբևէ չեմ ցանկացել ունենալ քույր կամ եղբայր:

-   Դրվագներ, որ տպավորվել են մանկության տարիներից:

-    Մանկությանս տարիները շատ վառ և գունավոր են եղել, սիրում էի բակային խաղերը, հիշում եմ իմ առաջին հեծանիվը, որն ինձ ծնողներս  էին նվիրել։ Հետաքրքիրն այն է, որ շատ չարաճճի չեմ եղել, հիմնականում զբաղվել եմ մշտադիտարկմամբ` անդադար հետևելով մեծերի վարքագծին:

-     Կպատմե՞ս դպրոցական  տարիներից:

-  Դպրոցական տարիներին ակտիվիստ եմ եղել, առօրյան հագեցած է եղել տարբեր մրցույթներով, միջոցառումներով, օլիմպիադաներով։  Ի դեպ, մինչև օրս կարծես թե նմանատիպ ավանդույթները շարունակվում են:

 -    «Փոքրիկ իշխան»․ Անտուան դը Սենտ-Էքզյուպերի․․․Ինչպիսի՞ն է քո ստեղծած այլ մոլորակը։

-      Վերջին ժամանակներում ավելի շատ ռեալիստական մոտեցումների կողմնակից եմ դարձել, հետևաբար, իմ մոլորակը ներկայիս իրականությունն է:

-    Ի՞նչ ես կարծում՝ կա՞ն վատ գրքեր։

-   Կարծում եմ՝ վատ գրքեր չկան, յուրաքանչյուր գրքից էլ կարելի է սովորել որևէ դրական բան:

-   Քո ընթերցած գրքերից ո՞րն է ամենատպավորիչը, ո՞ր գիրքն է, որ 2-րդ անգամ կընթերցես։

- Ընթերցելիս ինձ համար ամենահաճելին այն է, որ հանդիպում եմ հեղինակի այնպիսի մտքերի, որոնք կարծես թե արտատպված լինեն սեփական մտքերիցս: Սրանից ելնելով` կնշեմ Է․ Մ․ Ռեմարկի «Հաղթական կամարը» գիրքը՝ չնայած որ կարելի էր շատերին հիշատակել: Իսկ գիրքը, որը կարելի է անվերջ կարդալ, մեր Սուրբ գիրքն է` Աստվածաշունչը:

-    Ինչի՞ մասին ես երազում կյանքիդ  այս շրջանում:

-   Մտքերն իրականանալու հատկություն ունեն գաղափարով ոգեշնչվելով` երազում եմ ամեն օր․ հարցին կխուսափեմ պատասխանելուց, քանի որ, իմ կարծիքով, երազանքները չեն բարձրաձայնում, իսկ նպատակս այս պահին բուհը հաջողությամբ ավարտելն է:

-  Խոսենք նախասիրություններից․ ի՞նչն է, որ մի քանի ժամով քեզ կտրում է իրական կյանքից։

-  Ընթերցելը:

-  Ոստիկանական համակարգն ուժային կառույց է: Կին, ոստիկան․ այս հակասություններն ինչպե՞ս ես կարգավորում:

- Կին և ոստիկան հասկացությունները բացարձակ ոչ մի հակասության մեջ չեն գտնվում: Սեռը բացարձակ նշանակություն չունի ուժային կառույցում պատշաճ  ծառայություն իրականացնելու տեսանկյունից, տարբերությունը զուտ ֆիզիկական ուժի գործադրման հնարավորությունների մակարդակում է, ինչը կոմպենսացվում է այլ միջոցների գործադրմամբ: Հետևաբար, մասնագիտական հարուստ գիտելիքներով օժտված ծառայողը, անկախ սեռից, իրական հնարավորություն ունի դիմադրելու ծառայության ընթացքում առաջացած ցանկացած մարտահրավերի և հաղթահարելու  ցանկացած խոչընդոտ: Այլ է խնդիրը, որ ոստիկանությունում ծառայության պետք է անցնեն կամային հատկանիշներով օժտված անձինք:

-  Ինչպե ՞ս ընտրեցիր այս մասնագիտությունը:

-  Ինձ համար մանկուց գրավիչ է եղել այս մասնագիտությունը, սակայն  որոշումս վերջնականապես ամրապնդվել է հարազատներիս, ընկերներիս խորհրդով, որոնց երախտապարտ եմ:

-  Ուսանողական տարիներ. ինչպիսի՞ն է Կրթահամալիրում ուսանողական կյանքը:

-  Կրթահամալիրում ուսանողական կյանքը շատ հագեցած է, այստեղ մասնագիտական կարիերայի լավագույն ֆունդամենտ կարելի է ստեղծել:

- Ոստիկան /պարեկ/․ մի քանի բառով բնութագրի՛ր՝ ի՞նչ է քեզ համար այն։

Ոստիկանն ինձ համար անվտանգություն է, ուժ է և, ի վերջո, պետականություն:

- Ինչպիսի՞ն պետք է լինի իրական ոստիկանի կերպարը։

-  Իրական ոստիկանը նախ և առաջ պետք է գիտակ լինի, ունենա բարձր իրավագիտկցություն, լինի ազնիվ, պատասխանատու, ցանկացած ոլորտում հասարակության յուրաքանչյուր անդամի համար դրսևորի օրինակելի վարքագիծ:

 -  Մի քանի բառով նկարագրի՛ր Կրթահամալիրի սովորողի կերպարը։

- Նախորդիվ ասվածը կրթահամալիրի սովորողին ևս վերաբերելի է, քանի որ նա նույնպես ոստիկանության ծառայող է:

-   Ո՞րն է ոստիկան դառնալու քո շարժառիթը:

-  Շարժառիթը մասնագիտական աճն ու զարգացումն է:

-   Եթե հնարավորություն տրվեր փոխելու մասնագիտությունդ, ի՞նչ կընտրեիր:

-   Նորից կընտրեի կրթահամալիրը կամ գուցե օդաչու դառնայի, վերջերս մտքեր առաջացել են:

-    Ի՞նչ խորհուրդ կտաս նրանց, ովքեր ցանկանում են ընտրել Կրթահամալիրը։

-   Եղեք համարձակ, անընդհատ զբաղվեք  ինքնակատարելագործմամբ․ կրթահամալիրը գնահատում է գիտելիքը:

-   Թեմա, որի շուրջ անդադար կխոսես:

- Թեման էական չէ, կախված է զրուցակցից կամ ունկնդիրներից, հաճելի միջավայրում անվերջ կարելի է խոսել նույնիսկ ամենաանհեթեթ թեմայով:

-   Ո՞րն է կյանքի շարժիչ ուժը քեզ համար։

-  Մոտիվացիան:

Բլից հարցեր

Պատասխանում ենք կարճ և արագ։

-   Երեք բառ, որով կբնորոշես ինքդ քեզ:

-  Բարյացակամ, պատասխանատու, պատվախնդիր:

-   Միտք, որն առաջինը ծագում է արթնանալիս:

-  Եվս մեկ հնարավորություն:

-   Օրն սկսում ես ժամը…

-   07:30-ից։

-   Սիրածդ աֆորիզմը:

-   Նա, ով գիտի «ինչու»-ն, կարող է հաղթահարել գրեթե ցանկացած «ինչպես»-ը:

-   Սիրելի զբաղմունքդ:

-  Լավ երաժշտություն լսելը:

-   Խորհուրդ, որը կտայիր։

- Մեր ճանապարհը նման է լեռ բարձրանալուն, յուրաքանչյուր թվացյալ անհաջողություն ընդունեք իբրև մարտահրավեր և նոր հնարավորությունների սկիզբ, թույլ մի՛ տվեք, որ աննշան քամիները և թեկուզև ծանր փոթորիկները խանգարեն ձեզ բարձրանալ, եղե՛ք համառ, հավատացե՛ք ինքներդ ձեզ, և ամեն բան կհաջողի:

-   Իսկ վերջում․․ (ավելացրու՛ այն, ինչ մտքովդ անցնում է այս պահին)։

Շնորհակալ եմ, որ մինչև վերջ հետևեցիր:

                                                                                       Հարցազրույցը վարեց

առաջատար մասնագետ

                                                                                      Լիանա  Սահակյանը