Կրթահամալիրի սովորողները» խորագրով նախագծի շրջանակներում այս անգամ զրուցել ենք  ՀՀ ոստիկանության կրթահամալիրի ակադեմիայի իրավագիտության ֆակուլտետի առկա անվճար ուսուցման 3-րդ կուրսի սովորող, ոստիկանության սերժանտ Անի Գրիգորյանի հետ։

-    Ինչպիսի՞ ն էր փոքրիկ  Անին:

- Փոքրիկ Անին ամաչկոտ, նեղացկոտ  ու ժպտերես մի աղջնակ էր: Անվանս      բացատրությունը կապված է հայոց միջնադարյան քաղաքամայր Անիի հետ:

- Դրվագներ, որ տպավորվել են մանկության տարիներից, որո՞նք էին մանկությանդ տարիների խաղերը։

-  Մանկությունս շատ հետաքրքիր է անցել․ մինչ երեկո տեղի ունեցող բակային խաղերը, կոնֆետի թղթերով կազմակերպվող  ճամբարային միջոցառումները․․․

-    Կպատմե՞ս դպրոցական  տարիներից:

-  Դպրոցական տարիներն ամենաանհոգ և երջանիկ տարիներն էին,  և ամեն անգամ հիշելիս  դրական լիցքեր են արթնանում: Այնտեղ  ես թողեցի իմ առաջին քայլերը, սիրելի դասընկերներիս, իմ նստարանը ու սրտումս պահեցի դպրոցական հուշերը:

 -  «Փոքրիկ իշխան»․ Անտուան դը Սենտ-Էքզյուպերի․․․ Ինչպիսի՞ն է քո ստեղծած այլ մոլորակը։

-   Այն մոլորակը, որը ես եմ ստեղծում, դեռ չի հասել իր ավարտին․ բայց  և շատ իրական է:

-    Ի՞նչ եք կարծում, կա՞ն վատ գրքեր։

-     Չկան վատ գրքեր, ուղղակի մարդկանց  աշխարհընկալումն է տարբեր:

-  Քո ընթերցած գրքերից ո՞րն է ամենատպավորիչը, որ 2-րդ անգամ կընթերցես։

-  «Դեկամերոն»-ն իտալացի գրող Ջովաննի Բոկաչչոյի 100 նովելների հավաքածուն է՝ վաղ իտալական Վերածննդի ամենահայտնի գրքերից մեկը։  Այս գրքի նովելների մեծ մասը նվիրված է սիրուն` սկսած նրա սիրային և ավարտած ողբերգական կողմերով։ Կարծում եմ՝ մեծ հաճույքով ևս մեկ անգամ  կվերընթերցեի:

-    Ինչի՞ մասին ես երազում կյանքիդ  այս շրջանում։

-  Ըստ արժանվույն ավարտել կրթահամալիրը:

- Խոսենք նախասիրություններից․ ի՞նչն է, որ մի քանի ժամով քեզ կտրում է իրական կյանքից։

-  Նախասիրություններ շատ ունեմ, հատկապես ֆիլմ դիտելը, նկարելը( որն այդքան էլ չի ստացվում): Կարծում եմ՝  այն, ինչ ինձ ստիպում է կտրվել իրական կյանքից, ֆիլմ դիտելն է:

- Ոստիկանական համակարգն ուժային կառույց է: Կին, ոստիկան․ այս հակասություններն ինչպե՞ս ես կարգավորում:

-   Ոստիկանության համակարգում կնոջ դերն իր ուրույն նշանակությունն ունի: Ի վերջո, եկե՛ք փաստենք, որ ոստիկանություն-հասարակություն փոխհարաբերություններում վստահության գերակշիռ մասն ստեղծվում է հենց կին ծառայողների կողմից: Ցավոք, շրջապատում բոլորը չէ, որ ընդունում են կին ոստիկանին: Փորձում եմ կին ոստիկանի այնպիսի օրինակ լինել, որի թե՛ կեցվածքի, թե՛ վարվելաձևին նայելիս մարդիկ ավելի շատ ընդունեն ու վստահեն ոստիկանին:

-  Ինչպե ՞ս ընտրեցիր այս մասնագիտությունը:

-   Մասնագիտության ընտրության հարցում գուցե նշանակություն ունի գենետիկան, քանի որ հայրս էլ է եղել այս ոլորտի մարդ: Իսկ մեծանալով՝ հասկացա, որ ինձ այլ ոլորտում չեմ պատկերացնում և իմ առջև դրեցի նպատակ՝ սովորել այս մասնագիտությունը  և դրանում դրսևորել  ինձ առավելագույնս:

- Ուսանողական տարիներ. ինչպիսի՞ն է Կրթահամալիրում ուսանողական կյանքը:

-  Արդեն 3 տարի է, ինչ սովորում եմ կրթահամալիրում․ այն զարմանահրաշ աշխարհ է, որի դուռը  պետք է բացել և ապրել ամեն մի վայրկյանը:

-   Ոստիկան․ մի քանի բառով բնութագրի՛ր՝ ինչ է քեզ համար այն։

-  Համառություն, խիզախություն, կոկիկություն։

-   Ինչպիսի՞ն պետք է լինի իրական ոստիկանի կերպարը։

-    Օրենքը կրող և պահող, արդարամիտ:

-    Մի քանի բառով նկարագրի՛ր Կրթահամալիրի սովորողի կերպարը։

     Կրթահամալիրի սովորողը պետք է լինի կարգապահ, ձգտող, կարողանա գնահատել համազգեստ ու ուսադիր կրելու բարձր պատասխանատվությունը, պատվով կատարի իր առջև դրված պարտականությունները:

-     Ո՞րն է ոստիկան դառնալու քո շարժառիթը:

-    Հայրենիքիս համար պիտանի մարդ լինելու ձգտումը:

-    Եթե հնարավորություն տրվեր փոխելու մասնագիտությունը, ի՞նչ կընտրեիր:

-     Երևի կընտրեի պատմաբանի մասնագիտությունը:

-   Ի՞նչ խորհուրդ կտաս նրանց, ովքեր ցանկանում են ընտրել Կրթահամալիրը։

-  Ոստիկանի մասնագիտությունը լուրջ մասնագիտություն է և միաժամանակ շատ հետաքրքիր: Այնպես որ, պետք է երկար մտածել, նոր քայլեր ձեռնարկել:

-   Թեմա, որի շուրջ անդադար կխոսես:

-   Թեման այդքան էլ կարևոր չէ, եթե զրուցակիցը հետաքրքիր անձ է:

-   Ո՞րն է կյանքի շարժիչ ուժը քեզ համար։

-  Կարելի է  ասել՝ ես ինքս եմ ինձ համար ստեղծում, դա օգնում է դառնալ ավելի ինքնուրույն:

Բլից հարցեր

Պատասխանում ենք կարճ և արագ։

-   Երեք բառ, որով կբնորոշես ինքդ քեզ:

-   Իրատես, պարզ, աշխատասեր։

-   Միտք, որն առաջինը ծագում է արթնանալիս:

-   Օրն սկսել արդյունավետ:     

-   Օրն սկսում ես ժամը…

-    06: 00-ից։

-   Սիրածդ աֆորիզմը:

-   Խիղճը պատժում է հաճախ նույնիսկ այնտեղ, որտեղ օրենքը դա չի անում:

-   Սիրելի զբաղմունքդ:

-   Մեդիտացիա։

-   Խորհուրդ, որը կտայիր։

-    Չվախենալ փորձություններից:

-   Իսկ վերջում․․․ (ավելացրու՛ այն, ինչ մտքովդ անցնում է այս պահին)

    Ես սիրում եմ կյանքը, իսկ կյանքը՝ ինձ:

                                                                                        Հարցազրույցը վարեց

առաջատար մասնագետ

                                                                                      Լիանա  Սահակյանը